Stromae
Vanmiddag was d’r weer bloed geven, in Zutphen. Op ‘t parkeerterrein van de plaatselijke wielerclub steet dan zo’n grote oplegger waorin ‘t doneren plaatse vund. Ik zatte daor in een halletje te wachten op den dokter. Zi’j zol blooddruk bie mi’j metten en nog wat medische vraogen stellen, veurdat ze de naolde der in drukt. Inens heurden ik wat bekends uut ‘t plafond kommen. Een paar piano akkoorden, een bekende stemme in ‘t Frans, en elke keer een rits korte noten die oew as een gekarteld mes deur de kop hen sniedt... “L’enfert”, de helle. Stromae zingt aover zien stemmen die um de kop gek maakt, en waoran hee neet ontsnappen kan. ‘t Enige zol nog een beschamende zelf’ekaozen dood waen. Een jaor of zeuven he’j niks van Stromae eheurd. Hee is toentertied bekend worden met zien “Formidable”. Ik hebbe dizze clip vake bekekken en bespraoken met mien leerlingen op de vmbo en de ISK ‘t Erasmus in Almelo.De jongeluu konden zich good inlaeven in dizze keal die de verkering uut had, maor nog steeds kats gek van dat deerntje was. En noe kump’ terugge met nieje muziek. Nao een zware tied, jaorenlank kats van de wieze met stemmen in ‘t heufd. In de clip zee’j hoe dat veur ‘m was, met dat steeds terugge kommende kartelmes. De helle, l’enfert....